Eth Ostau Comengés

Eth Ostau Comengés Maison comuna 31210 Montrejau

Gascon, parla ta lenga Se voletz arrecéber era nòsta letra d'informacion cada mes que mos podetz contactar ad aquera adreça : ostaucomenges@orange.fr  MONTREJAU (31) 16 e 17 de març de 2012 9au edicion de PASSA-PÒRTS Coma eras annadas passadas, que volem qu'aquera hèsta siá ath còp culturala, conviviala e esportiva. Eth divendres 16 de març que serà era Jornada deths Gafets, consacrada aths dròlles qu'aprenguen eth occitan en Comenge (teatre, condes, quilhas...). 350 gafets que i son demorats. Eth endeman, que i aurà tostemps eths estagis de musica (clarin, aubuès, diatonic, percussions), de cant polifonic, de lenga occitana e de dança (sauts e branles biarneses). Qu'organizaram tanben era corsa a pè Era Hlama Occitana, en ame eths nòstis amics deth ACM Running Club. Que i aurà encara ua passejada toponimica ath torn de Montrejau, en partenariat en ame Eco-Rando. Eth ser, après eth trad'aperò e eth sopar deths productors, eth bal occitan que serà animat per Calhats (eth grop gascon que puja) e eth duo Brotto-Lopez. Inscripcions / Arrensenhaments : 05 61 95 12 46 / ostaucomenges@orange.fr ---------- CARGAR ETH PROGRAM ----------- ENQUÈSTAS PATRIMONIALAS SUS ERA CULTURA ORALA EN VAROSSA  Eras collèctas deth noste emplegat en Varossa que son ara acabadas. Pendent un shinhau mès de 6 meses, de deceme 2010 enlà deçath mes de junh 2011, que vesitèc eras 24 comunas deth canton de Maulion en arrecèrcas deras personas occitanofònas. Atau, 108 enquèstas que horen realizadas e quasi 90 personas encontradas. Tèmas coma era toponimia, eras tradicions, eth biaish de trebalhar de bèth temps a, era lenga, que horen tractas. E aquerò tostemps en occcitan-gascon. Eths ensenhaments tà nosatis que son hòrts, e qu'ei de non creir d'encontrar monde tan simples dab riquessas tan granas. Aqueris que's bremban d'istuèras perdudas, que saben se quin s'apèra aqueth prat o aquera maison quan totis ath entorn qu'ac an desbrembat. Que s'i ved clarament capvath eras collèctas que cada un ei preciós. En tot partir d'aquera caminada quasi jornalèra, que vam ara trebalhar entà hèr un documentari ara mòda deths autis dejà sortits (Eths Erbejaires, De Cornudèra a Palomèra e Era Mòla de Naut). Que parlarà deth hormatge de Varossa e eth monde deth país que'n seràn eths actors. Que s'i tractarà donc d'ua sociatat quan tot virava autorn dera lèit e deth bestiar. Un temps lonh e pròishi  ath còp. ERA MÒLA DE NAUT ETH DARRÈR DOCUMENTARI DETH OSTAU COMENGÉS SUS ERA MEMÒRIA GASCONA Après Eths Erbejaires (2008), qu'ensenhava se quin eths païsans haián autis còps era èrba en eths Pirenèus, e De Cornudèra a Palomèra (2009), sus eras activitats umanas en aqueras duas montanhas situadas entram Comenge e Coserans, era associacion Eth Ostau Comengés que ven de produsir un aute documentari : Era Mòla de Naut. En aqueth film de 26 mn arrealizat a Casavèth (09), Francis Péguillan que conda en ame passion era istòria dera mòla qu'aparten ara sua familha dempús 1812 e qu'a arrengat en ame paciéncia. Qu'explica eth sòn foncionament e tanben eras etapas dera fabricacion dera hariá. Qu'ensenha se quin cau picar eras pèiras, conda se quin se pagavan eths molièrs (era punhèra). Que torna tanben en ame nostalgia sus ua epòca on era mòla èra un lòc de convivialitat. Eth film qu'é a fèt en occitan gascon (sos-titolatge en francés). Qu'é disponible en DVD auprès dera association Eth Ostau Comengés (15 EUR + 1,70 EUR de pòrt). Contact : ostaucomenges@orange.fr / tel. : 05 61 04 49 24