En 2023, que i aurà era 18au edicion deth hestau Passa-Pòrts, neishut en 2004, a Montrejau. Un an après era neishença deth Ostau Comengés, que mos semblèc alavetz que mos caliá crear un eveniment que hussa ua veirina dera cultura occitana en Comenge, un hestau dubèrt aths "especialistas" e aths "non-especialistas". Que l'avem batejat Passa-Pòrts, en referéncia aths pòrts deths Pirenèus, aqueris còths que mos permeten d'anar de cap aras autras vaths e aras autras culturas.
Era prumèra edicion, mercada pera venguda de Lou Dalfin, qu'é un succès que permet de perenizar era manifestacion. Eras annadas seguentas, qu'acuelhem artistas venguts deths quate cantons dera Occitania (Lou Seriol, Coriandre, Tres a cantar, Castanha e Vinovèl, Corbefin-Marsac, Cance-Courtial, Traucatèrme...), dera Gasconha pirenenca (Arredalh, Totis tres, Parpalhon, Espartenhas, Alidé Sans, Eth Chòt, Bouilleur de sons, Revelhet...) o deth costat sud deths Pirenèus (La Sonsoni, Lo Aragon, Sergi Llena). E tant d'autis ! Mès Passa-Pòrts, n'é cap solament un gran bal trad' ! Qu'é tanben era Jornada deths Gafets, qu'amassa quauquarren coma 300 collegians a qui espectacles gratuïts son proposats (La Rampe-TIO, Arnaud Cance, Yves Durand, Alidé Sans, Mathieu Barés) e qui son tanben actors dera hèsta. Que son tanben exposicions, conferéncias, estagis, cantadas, caminadas toponimicas o encara ua corsa a pè.
Era annada 2020 qu'é ua virada. Pr'amor dera crisa sanitària, Passa-Pòrts qu'é annulat, coma en 2021. Que decidam alavetz de mos i tornar en tot deslocalizar Passa-Pòrts a Sent Gaudenç. Gràcia a de navèths partenaris (Comuna, 5C, Le Régent, l'Indépendante, eth OT, eth collegi D. Daurat), que volem botar era cultura occitana ath còr dera capitala deth Comenge e proposar activitats pendent ua setmana sancera, en tot multiplicar atau eras conneccions entram eths diferentis publics. Après era escajuda dera edicion 2022, que mos i tornam en 2023 !
Passa-Pòrts 2023 : que mos i tornam.
Telecargar eth programa
S'inscríver aths estagis
Telecargar eth arrepertòri deths cants entara cantada
Telecargar la lista deras ostalarias e arrestaurants a tocar deth hestau
Eth dijaus 30 de març, a compdar de 17h30, qu’organizaram, ara librariá L’Indépendante, ua lectura de tèxtes literaris sus eth tèma deth viatge e deth exil. A 20h30, que mos arretrobaram ath cinemà Le Régent enà véder dus documentaris d’Agnès Lanusse e Dominique Gauthier sus eth exòde deths Gascons en Argentina ath sègle XIX : Lo que me contó abuelito e La traversée de la Mar Grana.
Eth divendres 31 de març, Passa-Pòrts que’s desplaçarà ara Maison deth Saber de Sent Laurenç de Nesta qu'acuelherà un tepèr de collegians e liceans qu'aprenguen eth occitan en Comenge, Varossa, Vath d’Aura e Nebosan. Qu'assistaràn ath espectacle de condes de Marc Castanet e a un concert d’Arredalh . A 17h30, que mo’n tornaram enà Sent Gaudenç on arreceberam ath auditorium dera 5C Agnès Lanusse, que balharà ua conferéncia sus era emigracion gascona en Argentina ath sègle XIX.
Eth dissabde, de 10 h a 17 h, plaça aths estagis entaths confirmats :
Eth maitin, ua caminada urbana que permeterà de tornar descobrir eths lòcs emblematics de Sent Gaudenç.
A 15 h, que poiram arrencontrar B. Larradet, autor deth roman Jamei aiga non cor capsús, entà ua rencontra-dedicaça ara librariá L’Indépendante.
Enfin, eth dimenge, a 11 h, eth film d'animacion doblat en occitan (dambe ST en francés), Letra a Momò, que serà projectat ath Régent.
